တကယ်လို့ ရောဂါပိုး ဝင်လာခဲ့ရင် ဘာမှပြင်ဆင်ထားတာမရှိဘူး

0
1484

စစ်ကိုင်းတိုင်း၊ နာဂဒေသ၊ ပန်ဆောင်မြို့နဲ့ ထိစပ်နေတဲ့ အိန္ဒိယနိုင်ငံ နန်ပေါင်မြို့မှာ ကိုရိုနာဗိုင်းရပ်စ်ပိုးရှိသူ ၃ ဦးတွေ့ရှိထားပါတယ်။ ပြီးခဲ့တဲ့ ၁၅ ရက်က ရောဂါပိုးတွေ့ရှိခဲ့တာဖြစ်ပြီး ပန်ဆောင်နယ်စပ်ဂိတ်ကို အဝင်အထွက်ပိတ်ထားပါတယ်။ အဲဒီဂိတ်ဟာ စျေးရောင်းစျေးဝယ် ကုန်သွယ်မှုတွေကို အပြန်အလှန်ဆက်သွယ်နေသလို ပန်ဆောင်မြို့အပါအဝင် ရွာပေါင်း ၁၁ ရွာဟာ အိန္ဒိယနိုင်ငံနဲ့ ထိစပ်နေတာပါ။ အခုလက်ရှိ မြန်မာဘက်ခြမ်း ပန်ဆောင်မှာ ဘာတွေပြင်ဆင်မှုတွေ ပြုလုပ်နေလဲဆိုတာကို ဒေသခံကျေးရွာအုပ်ချုပ်ရေးမှူးတစ်ဦးဖြစ်တဲ့ ဦးတောင်ကူးနဲ့ မုံရွာဂေဇက်က ဆက်သွယ်မေးမြန်းထားပါတယ်။

ထက်ဖြိုး ဆက်သွယ်မေးမြန်းသည်။

MGZ – အခု ဦးလေးတို့နဲ့ သိိိပ်မဝေးတဲ့နေရာမှာ ရောဂါပိုးရောက်ရှိနေပြီဆိုတော့ ဒေသရဲ​့ အခြေအနေလေး ပြောပြပေးပါဦး။

UTK – တစ်နေ့က မြို့နယ်ဦးစီးအစည်းအဝေးမှာကတော့ ကျနော်တို့ကိုပြောတာက အခုအိန္ဒိယမှာဆို နန်ပေါင်မှာ အနီးကပ်ရောက်လာပြီ။ အဲဒီဘက်ကနေ ဝင်လာတဲ့သူနဲ့ ဒီဘက်ကသွားလာတဲ့သူ အထူးဂရုစိုက်၊ အရင်ကထက်တောင် ဂရုစိုက်ရမယ်။ အရင်ကဆိုတာက အိန္ဒိယမှာ ခပ်ဝေးဝေးမှာပဲ ကြားရတယ်။ အခုအနီးအနားမှာ ရောက်လာပြီဆိုတော့ အထူးဂရုစိုက်ရမယ်။ တကယ်လို့ ဒီဘက်ကို ကိုယ့်အမျိုးတွေ၊ ဆွေမျိုးတွေ ရောက်လာမယ့်ဟာရှိတယ်ဆိုရင်လည်း ကြိုတင်သတင်းပို့ပြီးတော့မှ မလာဖို့၊ အဲလိုပဲပြောတယ်။ တကယ်လို့ ရောက်လာခဲ့ရင် ဘယ်လို ပြင်ဆင်ထားတယ်။ နေရာထိုင်ခင်းကအစ ဘာမှလည်း မပြောဘူး။

MGZ – နယ်စပ်ဂိတ်မှာ ဘယ်လိုတွေ ထိန်းချုပ်ဆောင်ရွက်နေလဲ။

UTK – အဲဒါကျတော့ ကျနော်လည်း အသေးစိတ်တော့ မသိဘူး။ သို့သော်လည်းပဲ ဂိတ်မှာကတော့ သူတို့ ဒီဘက်ကဆိုရင်လည်းပဲ ဂိတ်မှာက အိန္ဒိယစျေးနဲ့ ဗမာပြည်စျေးက အဆောင်တွေ ဆောက်ထားတာပေါ့။ အဲဒါတွေလည်း လုံး၀မဖွင့်ဘူးဆိုတော့ လုံး၀ အဝင်အထွက်မရှိဘူး။ တကယ်လို့ လိုအပ်ခဲ့တယ်ဆိုလည်းရင်လည်း ပန်ဆောင်စစ်တပ်နဲ့ ရုံးအဖွဲ့အစည်းတွေက ဖုန်းနဲ့ပဲ အဆက်အသွယ်လုပ်ကြတဲ့ သဘောရှိတယ်။

MGZ – လက်ရှိအခြေအနေနဲ့ ပတ်သက်ပြီး နာဂဦးစီးအဖွဲ့က ဘယ်လိုညွှန်ကြားချက်တွေ ထုတ်ပြန်ထားလဲ။

UTK – အခုလောလောဆယ်ကတော့ ဒီကိစ္စနဲ့ပတ်သက်ပြီး ဒီနယ်မြေမှာလည်းပဲ အေးအေးဆေးဆေးပဲဆိုတော့ ဘာမှတော့မရှိဘူး။ ခုနားကပြောသလိုပဲ အိန္ဒိယဘက်ကနဲ့ လူဝင်လူထွက် သတိထားဖို့၊ ဆင်ခြင်ဖို့။ ဟိုဘက်ကနေအဝင်အထွက်လုပ်မယ်ဆိုရင်လည်း အိန္ဒိယရောက်နာဂတွေဆိုတော့ အမျိုးတွေပဲ ရှိမှာပါ။ သူစိမ်းတွေတော့ ဝင်ထွက်သွားလာမှု ရှိမှာမဟုတ်ဘူး။ အဲဒါကိုပဲ ဆင်ခြင်ဖို့ ခုနားကပြောတဲ့ ပုံစံပဲ ပြောတယ်။ အခု သူတို့ညွှန်တဲ့ဟာကတော့ နိုင်ငံတော်ကနေ စည်းမျဉ်းဥပဒေထုတ်ထားတယ်။ အဲဒါကိုပဲ မြို့နယ်ကနေ ရပ်ရွာအဆင့်ဆင့် ညွှန်ကြားတယ်။ နောက်ပြီးတော့ ခရီးသွားလာတဲ့သူကိုလည်း ပြည်မကနေလာတဲ့လူဆိုရင်လည်း ဆင်ခြင်ဖို့။ သူတို့ကထောက်ခံချက်ပါသလား၊ မပါဘူးလား။ ဂိတ်မှာကော အစစ်ခံပြီးသား လူလား။ မခံသေးဘူးလား ဆိုတဲ့ဟာကိုလည်းပဲ ရပ်ရွာမှာ စိစစ်ပြီးတော့မှ လက်ခံဖို့။ ပရမ်းပတာ မလက်ခံဖို့ ညွှန်ကြားတာရှိတယ်။

MGZ – တကယ်လို့ ရောဂါပိုးကူးစက်ဝင်ရောက်လာခဲ့ရင် ဘာတွေကြိုတင်ပြင်ဆင်ထားတာရှိလဲ။

UTK – တကယ်လို့ ဝင်လာရင်တော့ ကျနော်တစ်ယောက်အမြင်ဆိုရင်တော့ တော်တော်အခက်အခဲရှိတယ်။ တကယ်လို့ ဖြစ်လာခဲ့ရင် ဘယ်လို ဘယ်လိုရှိတယ်။ ဘာညာဆိုတာကတော့ သူတို့ကတော့ မပြောပြဘူး။ ပြင်ဆင်ထားတာလည်း မရှိဘူး။

MGZ – အခုပိတ်လိုက်တဲ့ ဂိတ်က နှစ်နိုင်ငံ စျေးရောင်းစျေးဝယ် ကုန်သွယ်မှုပြုလုပ်နေတဲ့ ဂိတ်လည်း ဖြစ်တယ်ဆိုတော့ တကယ်လို့များ ဝင်ထွက်ခွင့်ပိတ်တာ အချိန်က​ြာသွားရင် ဘယ်လိုအကျိုးသက်ရောက်မှုတွေ ရှိလာနိုင်လဲ။

UTK – တကယ်လို့ဖြစ်လာခဲ့ရင် အမျိုးမျိုးအခက်အခဲတော့ ဖြစ်လာနိုင်တယ်။ အမျိုးမျိုးအခက်အခဲဆိုတာက စားဝတ်နေရေးကအစပေါ့နော်။ ဘာကြောင့်လဲဆိုတော့ ကျနော်တို့ကလည်း ဒီပန်ဆောင်စျေးကိုပဲ အခြေခံပြီးတော့မှ လုပ်ကိုင်စားသောက်တဲ့ ကျေးရွာတွေဆိုတဲ့အခါကျတော့ စျေးနေ့တိုင်းသွားရတယ်။ ကျန်တဲ့ အချိန်တွေမှာလည်း အချိန်ရရင် ရသလို၊ လိုရင် လိုအပ်သလို သွားလာတာတော့ရှိတယ်။ တကယ်လို့ အဲလိုဆိုင်တွေပိတ်မယ်ဆိုရင် ဒီဒေသမှာတော့ ဆားတွေ အခက်အခဲရှိမယ်။ ဟင်းသီးဟင်းရွက် အခက်အခဲရှိနိုင်တယ်လို့ ကျနော်ကတော့ မြင်တယ်။

MGZ – တိုင်းအစိုးရကဖြစ်ဖြစ်၊ နာဂဦးစီးအဖွဲ့ကဖြစ်ဖြစ် ဘာတွေထောက်ပံ့ကူညီတာတွေရှိလဲ။

UTK – ရောဂါတွေ စဖြစ်တဲ့အချိန်က အခြေအနေကိုပြောရမယ်ဆိုရင်တော့ သူတို့က ဟင်းသီးဟင်းရွက်တွေ ထွေအုပ်ဦးစီးက အနည်းအကျဉ်းပေးတယ်။ ဆန်တွေကတော့ ပတ်ဝန်းကျင်က ပေးတယ်။ သူတို့ဟာသူတို့ ချက်စားတယ်။ လိုအပ်တဲ့ ဟင်းသီးဟင်းရွက်ပဲ ထောက်ပံ့တာရှိတယ်။

MGZ – ထောက်ပံ့တာက အစိုးရကလား။

UTK – အစိုးရကလည်း မဟုတ်ဘူး။ အဲဒီမှာရှိတဲ့ လူကြီးတွေကနေပြီးတော့ သူတို့ပေးနိုင်တဲ့ဟာလေးတွေကိုပဲ ပေးကမ်းတဲ့ သဘောပဲရှိတယ်။

MGZ – အစိုးရကထောက်ပံ့ထားတာ မရှိဘူးလို့ ပြောချင်တာလား

UTK – ဟုတ်ကဲ့၊ ဟုတ်ကဲ့။ အဲလိုမျိုးမရှိဘူး။

MGZ – ဟုတ်ကဲ့။ ကျေးဇူးပါပဲဗျ။

LEAVE A REPLY

Please enter your comment!
Please enter your name here